ဗုဒ္ဓဘာသာဝင်များ သိထား သိမ်းထား သင့်သော မန်းရွှေစက်တော် ဘုရားသမိုင်း

”မန်းရွှေစက်တော်ဘုရားသမိုင်း” မြတ်စွာဘုရားရှင် ကိုယ်တော်တိုင် ချထားပေးတော် မူခဲ့သော ခြေတော်ရာများကို ဌာပနာပြု၍ တည်ထားကိုးကွယ်လာခဲ့သော မန်းရွှေစက်တော် ဘုရားများသည် ယနေ့ထက်တိုင် တည်ရှိနေလျှက် ရှေးဟောင်းသမိုင်းဝင် အမွေအနှစ်တစ်ခုပင် ဖြစ်ပါသည်။ မြန်မာပြည်တွင် ရက်ပေါင်းအများဆုံးကျင်းပသော အညာဒေသပွဲတော်ဟုပင် ဆိုနိုင်ပါသည်။ ထို့ကြောင့် ပြည်သူအများ ကြည်ညိုသဒ္ဓါပွားနိုင်ရန်အလို့ငှာ မန်းရွှေစက်တော်ဘုရားသမိုင်းကို ထပ်မံတင်ပြလိုက် ပါသည်။

အခန်း(၁)

မြတ်စွာဘုရားရှင် သက်တော်ထင်ရှားရှိစဉ်အခါ၊ သာဝတ္ထိမြို့၊ ဇေတ၀န်ကျောင်းတော်မှာ သီတင်း သုံးနေတော်မူပါတယ်။ ထိုအချိန်မှာ သုနာပရန္တတိုင်း၊ ၀ါဏိစ္စဂါမရွာ(ယခု မြန်မာနိုင်ငံ၊ မကွေးတိုင်း၊ မင်းဘူးခရိုင်၊ ပွင့်ဖြူမြို့နယ်၊ လယ်ကိုင်းမြို့) တွင် မဟာပုဏ္ဏနဲ့ စူဠပုဏ္ဏဆိုတဲ့ ညီအစ်ကိုနှစ်ယောက်ရှိပါတယ်။ ၎င်းညီ အစ်ကိုနှစ်ယောက်ဟာ ကုန်သည်များဖြစ်ကြပြီး၊ တစ်လှည့်စီ လှည်းငါးရာနှင့်အတူ အိန္ဒိယနိုင်ငံသို့ ကူးသန်းရောင်းဝယ်နေကြပါတယ်။

အကိုဖြစ်သူ မဟာပုဏ္ဏဟာ ကူးသန်းရောင်းဝယ်သွားရင်း သာဝတ္ထိမြို့၊ ဇေတ၀န်ကျောင်းတော် အနီးမှာ ခေတ္တရပ်နားတည်းခိုနေစဉ်၊ မြို့သူမြို့သားများဟာ လှူဘွယ်ပစ္စည်းများနှင့်အတူ နေ့စဉ်နံနက် တစ်ကြိမ် ညနေတစ်ကြိမ် ဖြတ်သွားနေကြတာကို မဟာပုဏ္ဏကမြင်တွေ့နေရလို့ မေးမြန်းကြည့်တော့ “မြတ်စွာဘုရားရှင်ပွင့်တော်မူနေပြီဖြစ်ကြောင်း၊ ဇေတ၀န်ကျောင်းတော်မှာ သီတင်းသုံးနေတော်မူပြီး၊ တရားဒေသနာတော်များ ဟောကြားနေကြောင်း၊ ယခု မြတ်စွာဘုရားရှင်အား လှူဒါန်းရင်းနဲ့တရားနာရန် သွားရောက်မည်ဖြစ်ကြောင်း”ဖြေကြားသဖြင့် မဟာပုဏ္ဏလည်း စိတ်ဝင်စားကာ အတူလိုက်ပါသွားခဲ့ ပါတယ်။

မဟာပုဏ္ဏဟာ ဘုရားရှင်ရဲ့ တရားတော်ကိုနာယူပြီးတဲ့နောက် ဗုဒ္ဓဘာသာဝင်ဖြစ်ကာ၊ နောက်တစ်နေ့မှာ ဘုရားရှင်နှင့် နောက်ပါသံဃာငါးရာတို့ကို ပင့်ဖိတ်ပြီး ဆွမ်းကပ်ပါတယ်။ ဆွမ်းကပ်ပြီးလို့ တရားတော်များကိုနာယူပြီးနောက် မဟာပုဏ္ဏဟာ ရဟန်းပြုခွင့်ပေးပါရန် ခွင့်ပန်သဖြင့် ဇေတ၀န်ကျောင်း သို့ခေါ်ပြီး ရဟန်းပြုပေးလိုက်ပါတယ်။ ရဟန်းဖြစ်လာတဲ့ မဟာပုဏ္ဏဟာ အတူလိုက်ပါလာတဲ့ ကုန်သည်များ ကို ဌာနေသို့ပြန်လွှတ်ပြီး ကုန်ပစ္စည်းအားလုံးကိုလည်း ညီငယ်အားအပ်နှံကာ ဇေတ၀န်ကျောင်းမှာ သီတင်းသုံးနေ၍ တရားဘာဝနာများ အားထုတ်နေပါတော့တယ်။

တစ်နေ့မှာ မဟာပုဏ္ဏရဟန်းဟာ သာဝတ္ထိမြို့ရဲ့ ချမ်းအေးလှတဲ့ ရာသီဥတုဒဏ်ကြောင့် ကောင်းစွာတရားအားမထုတ်နိုင်ဖြစ်သဖြင့် ဌာနေ ဖြစ်တဲ့ ၀ါဏိစ္စဂါမရွာသို့ပြန်၍ တရားအားထုတ်ခွင့်ပြုပါရန် ဘုရားရှင်ထံခွင့်တောင်းပါတယ်။ မဟာပုဏ္ဏ ရဟန်းဟာ မြတ်စွာဘုရားရှင်ထံမှ တရားတော်များကို နာယူပြီး၊ ၀ါဏိစ္စဂါမရွာသို့ပြန်ကာ ကောင်းစွာ တရားအားထုတ်နိုင်သဖြင့် ထိုနှစ်ဝါတွင်းမှာပင် ရဟန္တာအဖြစ်သို့ ရောက်ရှိတော်မူပါတယ်။ (မြန်မာပြည်ရဲ့ ပထမဦးဆုံးရဟန္တာဖြစ်ပါတယ်။)

အခန်း (၂)

ညီဖြစ်သူ စူဠပုဏ္ဏဟာ ကုန်သည်လုပ်ငန်းတွေကို ဆက်လက်တာဝန်ယူရပါတယ်။ တစ်နေ့မှာ ကုန်ရောင်းဝယ်အတွက် ခရီးမထွက်မီ အကိုကြီးမဟာပုဏ္ဏရဟန္တာအား ဆွမ်းကပ်လှူခြင်း၊ သီလခံယူ ဆောက်တည်ခြင်းကိုပြုပြီး၊ ယခုထွက်ခွာမည့် ရေလမ်းခရီးကိုစောင့်ရှောက်ပေးပါရန်ပြောကာ သင်္ဘော ခရီးစဉ် စတင်ခဲ့ပါတယ်။ စူဠပုဏ္ဏတို့ ကုန်သည်အဖွဲ့ဟာ ရေလမ်းခရီးသွားနေစဉ်လမ်းမှာ မာလာယုကျွန်းသို့ရောက်ရှိကြပြီး ကျွန်းပေါ်တက်ခဲ့ကြပါတယ်။ စားသောက်ရန် ချက်ပြုတ်ဖို့အတွက် ထင်းရှာထွက်ခဲ့ကြပြီး ၊ သစ်ပင်များကို ခုတ်လှဲမီးရှို့ကြတဲ့အခါ အလွန်မွှေးကြိုင်လှတဲ့ ရနံ့များရရှိကြသဖြင့် သေချာစစ်ဆေးကြည့်ရှုလိုက်တော့ အလွန်တန်ဖိုးကြီးလှတဲ့ စန္ဒကူး (နံ့သာဖြူ) ပင်တွေဖြစ်နေတာကို တွေ့လိုက်ရတယ်။

ဒါကြောင့် ပါလာတဲ့ ကုန်ပစ္စည်းအားလုံးကို စွန့်ပစ်ပြီး စန္ဒကူးပင်တွေကို ရသလောက်ခုတ်ကာ သင်္ဘောပေါ်တင်ကြတယ်။ အဲဒီအခါ စန္ဒကူးတောဟာ ကုန်လုနီးပါးအထိဖြစ်သွားတော့ အဲဒီစန္ဒကူးတောမှာ နေထိုင်တဲ့ဘီလူးတွေဟာ ဒေါသအမျက်ချောင်းချောင်းထွက်နေကြတယ်။ “ဒီလူသားတွေကို ဒီကျွန်းပေါ်မှာ သတ်ပစ်လိုက်ရင် ပုတ်စော်နံကုန်မှာစိုးလို့ သင်္ဘောထွက်ပြီးမှ နောက်ကနေလိုက်သတ်ပစ်မယ်” လို့လဲ ကြံစည်ကြိမ်းဝါး ထားကြတယ်။

သဘောင်္ထွက်ပြီး မကြာမီမှာပင် မုန်တိုင်းကြီး ရုတ်တရက် စတင်လာပြီး၊ အဲဒီနောက် လေကြမ်း၊ မိုးကြမ်းကျလာကာ ဧရာမလှိုင်းလုံးကြီးတွေ ထောင်တက်လာလိုက်တာ မိုးသက်မုန်တိုင်းကြားမှာ သင်္ဘော ဟာ နစ်တော့မလိုဖြစ်လို့ သဘောင်္သားအားလုံး “ကယ်တော်မူပါ၊ ကယ်တော်မူပါ”လို့ အော်ဟစ်ပြီး ဟိုပြေးဒီလွှာနဲ့ ပြာယာခတ်ကုန်ကြတယ်။ ဘီလူများ စတင်တိုက်ခိုက်နေကြပြီ။ စူဠပုဏ္ဏဟာ ဘယ်လိုမှ မတတ်နိုင်တဲ့အဆုံးမှာ သဘောင်္ဦးမှာမတ်တက်ရပ်ပြီး “နောင်တော်ကြီးကယ်တော်မူပါ” လို့ သုံးကြိမ်အော် ၍ အကူအညီတောင်းလိုက်တယ်။

နောင်တော် မဟာပုဏ္ဏရဟန္တာလည်း ကြားရသည့်နှင့်တစ်ပြိုင်နက် ကောင်းကင်ယံမှ ကြွလာကာ သဘောင်္ဦးမှာရပ်တော်မူပြီး မိုးသက်မုန်တိုင်းကို တန်ခိုးတော်ဖြင့် ရပ်စဲပစ်လိုက်ပါတယ်။ ဒီလိုနဲ့ မဟာပုဏ္ဏရဟန္တာရဲ့ ကျေးဇူးတော်ကြောင့် သင်္ဘောဟာ ၀ါဏိစ္စဂါမရွာကို အန္တရာယ်ကင်းဘေးရှင်းစွာ ပြန်ရောက်နိုင်ခဲ့ပါတယ်။ အဲဒီနောက် စန္ဒကူးအချို့ကို လှူဒါန်းလာသဖြင့် ၎င်းတို့ကိုကျောင်းတော်ကြီးဆောက်လုပ်ကာ၊ ၎င်းစန္ဒကူးကျောင်းတော်ကြီးကို ဆက်၍လှူဒါန်းမယ်လို့ စိတ်ကူးကာ မဟာပုဏ္ဏရဟန္တာကြီးဟာ မြတ်စွာ ဘုရားရှင်ကို ပင့်ဆောင်ဖို့ သာဝတ္ထိပြည်သို့ ကောင်းကင်ခရီးဖြင့် ကြွသွားပါတယ်။

မြတ်စွာဘုရားရှင်ဟာ မဟာပုဏ္ဏရဲ့အလှူကိုလက်ခံတော်မူပြီး၊ ရှင်အာနန္ဒာအပါအ၀င် အတူ လိုက်ပါမည့် ရဟန္တာ (၄၉၉) တို့ကို စီစဉ်နေတော်မူချိန်မှာ၊ တာဝတိ`ံသာနတ်ပြည်က သိကြားမင်းရဲ့ (ပန္တုကဗလာမြကျောက်ဖျာ) ကလှုပ်တော်မူတယ်။ အကြောင်းရင်းကို သိကြားမင်းကြည့်လေသော်၊ မြတ်စွာဘုရားရှင် ၀ါဏိစ္စဂါမရွာကို ကြွချီဖို့အတွက် ရထားပျံလိုအပ်နေကြောင်း သိရသဖြင့်၊ ရထားပျံ (၅၀၀) ကိုစီမံပြင်ဆင်ပေးတော်မူပါတယ်။ ဘုရားရှင်ဟာ ရဟန္တာ (၄၉၉) ပါးကိုရထားပျံ (၅၀၀)ဖြင့် နောက်ဆုံး ရထားပျံတွင် ရဟန္တာမပါပဲ သုနာမရန္တတိုင်းသို့ ကြွတော်မူပါတယ်။

သုနာပရန္တတိုင်း (မကွေး) သို့မရောက်မီ လမ်းခုလပ် သစ္စာဗန္ဓတောင် အရောက်မှာ ဘုရားရှင်ဟာ ရထားပျံများကို ကောင်းကင်ယံထက်ရပ်တန့်စေပြီး ထိုတောင်ပေါ်သို့ တစ်ပါးတည်းကြွတော် မူပါတယ်။

အခန်း (၃)

သစ္စာဗန္ဓတောင်မှာတော့ ယခင်က သစ္စာဗန္ဓမုဆိုးအဖြစ် နေခဲ့ရာမှ ကျွတ်တမ်းဝင်ပြီး ရသေ့ဝတ် ကာ ယခု သစ္စာဗန္ဓရသေ့တစ်ပါးနေထိုင်နေပါတယ်။ သစ္စာဗန္ဓမုဆိုးဟာ အရင်ဘ၀က ရွာတစ်ရွာမှာအလွန်ဆိုးသွမ်းတဲ့ နွားလားဥဿဖကြီးဖြစ်ခဲ့ဖူးပြီး၊ ရွာသူရွာသားတွေ ၀ိုင်းသတ်ကြလို့ သေဆုံးကာ ယခုဘ၀မှာ “မကုလ”လို့ခေါ်တဲ့ တောင်မှာ ခွန်အားဗလ နဲ့ပြည့်ဝတဲ့ မုဆိုးကြီးဘ၀ရခဲ့တယ်။

အရင်ဘ၀က နွားလားဥဿဖကြီးကို သတ်ခဲ့တဲ့ ရွာသူရွာသားတွေ ကတော့ ယခုဘ၀မှာ သမင်၊ ဒရယ်စတဲ့ အဲဒီမုဆိုးကြီးရဲ့ သားကောင်များဖြစ်လို့ နေပါတယ်။ အမဲလိုက်ခြင်းနဲ့အသက်မွေးနေတဲ့ မုဆိုးကြီးဟာ အကုသိုလ်တွေများလွန်းနေတာကို သိလိုက် ရတဲ့ သိကြားမင်းက ဒီဘ၀ကနေကယ်ချွတ်ဖို့ မုဆိုးအသွင်ဖန်ဆင်းပြီး မုဆိုးကြီးလာမည့် လမ်းကနေ စောင့်နေပါတယ်။ မုဆိုးနှစ်ယောက်တွေ့ကြတော့ ဒေသခံမုဆိုးက “ဟေ့ မုဆိုး၊ င့ါပိုင်နက်တောထဲကို ဘာလာလုပ်တာလဲ၊ ခုထွက်သွားစမ်း”လို့ပြောတော့၊ သိကြားမင်းမုဆိုးက “အေနီ ဆိုတဲ့သားကောင် တစ်ကောင်ပျောက်သွားလို့ လိုက်ရှာရင်းနဲ့ ဒီတောထဲထိရောက်လာခဲ့တာ၊ မင်းတွေ့အောင်ရှာပေးရမယ်။ မတွေ့ရင် လျော်ကြေးပေးရမယ်။ မပေးနိုင်ရင် ဒီတောထဲက ထွက်ပေးရမယ်”လို့ပြောပြီး လေးနှင့်မြှား အစုံပေးကာ တောင်ကုန်းတစ်နေရာမှာ ပုန်းကွယ်ပြီး စောင့်ကြည့်နေတယ်။

၎င်းတောင်ကို “သိကြားပုန်း တောင်” လို့ ယနေ့တိုင် အမည်တွင်ပါတယ်။ ဒေသခံ မုဆိုးဟာ ခွန်အားဗလကြီးမားသော်လည်း လေးနှင့်မြှားကို အကြိမ်ကြိမ်တင်ပါ သော်လည်း ဘယ်လိုမှ တင်မရဖြစ်နေတယ်။ အဲဒီလို ဒုက္ခရောက်နေစဉ်မှာပဲ သိကြားမင်းက ပုန်းကွယ်ရာမှ ထွက်လာပြီး“သင်ဒီဒုက္ခက လွတ်ချင်သလား၊ လွတ်ချင်ရင်ငါ့ရဲ့သစ္စာစကားကို ခံယူရလိမ့်မယ်”“သင်က ဘာမို့လို့ သစ္စာစကားခံယူရမှာလဲ” လို့မေးတော့ “ငါဟာ သိကြားမင်းပဲ”ဟု သိကြားမင်းဟာ မူလပုံသဏ္ဍာန်ကို ပြန်ပြောင်းပြီး ပြောလိုက်တယ်။

“ဘာသစ္စာခံယူရမလဲ” “ခုအချိန်ကစပြီး တောလိုက်ထွက်ရင် အထီးသတ္တ၀ါကိုသာ ပစ်ပါမယ်လို့သစ္စာဆိုပြီး ထွက်ပါ။ အဲဒီနေ့မှာ အထီးသတ္တ၀ါကိုသာ ပစ်ရမယ်။ နောက်တစ်ရက်ကျရင် အမသတ္တ၀ါတွေကိုသာ ပစ်ပါ့မယ်လို့ သစ္စာဆိုပြီးထွက်ပါ။ အဲဒီနေ့မှာ အမသတ္တ၀ါကိုသာပစ်ရမယ်။ လွဲမှားခဲ့ရင် သင်သစ္စာပျက်ပြီ” လို့ သိကြားမင်းကပြောတော့- “ကောင်းပါပြီ”လို့ မုဆိုးကြီးက သစ္စာပြုလိုက်တယ်။ ဒါကြောင့် သိကြားမင်းက မုဆိုးကြီး အကုသိုလ်တွေမလုပ်ဖြစ်အောင် သစ္စာပြုခဲ့လို့ သစ္စာဗန္ဓမုဆိုးလို့အမည် တွင်ပါတယ်။

“သစ္စာ” ဆိုတာ ကတိသစ္စာ၊ “ဗန္ဓ” ဆိုတာကတော့ နှောင်ဖွဲ့ခြင်း၊ တုတ်နှောင်ခြင်း ဆိုတဲ့ အဓိပ္ပါယ်ရပါတယ်။ အဲဒီ သစ္စာဗန္ဓမုဆိုးကြီးနေတဲ့ တောင်ကိုလည်း “သစ္စာဗန္ဓတောင်” လို့ခေါ်ကြတယ်။ အဲဒီလိုနဲ့ မုဆိုးကြီးဟာ တောလိုက်ထွက်တဲ့အခါ အထီးတွေချည်းပစ်မယ်ဆိုတဲ့နေ့မှာ အမတွေချည်းသာတွေ့ရပြီး၊ အမတွေချည်း ပစ်မယ်ဆိုတဲ့နေ့မှာ အထီးတွေနဲ့ချည်းတွေ့ရတယ်။ အဲဒီရက်တွေမှာ မုဆိုးကြီးဟာ သတ်သတ်လွတ်စားပြီး အချိန်တွေကုန်ခဲ့ရတယ်။ (ဒီလိုဖြစ်အောင်လည်း သိကြားမင်းက တမင်တကာဖန်တီးထားတာလို့ ဆိုပါတယ်) အဲဒီနောက် သစ္စာဗန္ဓမုဆိုးကြီးဟာ စိတ်ပျက်လာပြီး လေးမြှားတွေကို တောင်ပေါ်ကပစ်ချစွန့်ပစ်ကာ အဲဒီတောင်ပေါ်မှာပဲ ရသေ့ဝတ်နေ လိုက်တယ်။ သစ္စာဗန္ဓရသေ့လို့ အမည်တွင်ပါတယ်။ အဲဒီ သစ္စာဗန္ဓရသေ့ကြီးကို တရားဟောဖို့ ဘုရားရှင် ဟာ ခေတ္တခဏ သစ္စာဗန္ဓတောင်ပေါ်ကို ကြွရောက်ဆင်းသက်တော် မူလာခြင်းဖြစ်ပါတယ်။

အခန်း(၄)

မြတ်စွာဘုရားရှင်က သစ္စာလေးပါးတရားကို ဟောကြားတော်မူပြီးသည့်အဆုံးမှာတော့ သစ္စာဗန္ဓရသေ့ကြီးဟာ ရဟန္တာအဖြစ်သို့ ရောက်ရှိတော်မူပါတယ်။ (သစ္စာဗန္ဓရဟန္တာ ဟာ မြန်မာပြည်ရဲ့ ဒုတိယမြောက်ရဟန္တာဖြစ်ပါတယ်။ ) အဲဒီနောက် ဘုရားရှင်ဟာ ရထားပျံ (၅၀၀) အနက် လွတ်နေတဲ့ နောက်ဆုံး ရထားပျံမှာ သစ္စာဗန္ဓရဟန္တာကို စီးစေပြီး ၀ါဏိစ္စဂါမရွာသို့ ဆက်လက်ကြွမြန်းတော်မူပါတယ်။

ဘုရားရှင်ဟာ မဟာပုဏ္ဏရဟန္တာလှူဒါန်းတဲ့ စန္ဒကူးနံ့သာကျောင်းတော်မှာ (၇)ရက်တိုင် သီတင်း သုံးပြီး နေ့ညမပြတ် တရားဒေသနာများ ဟောကြားတော်မူရာ တစ်ရက်လျှင် လူပေါင်းရှစ်သောင်း လေးထောင် ကျွတ်တန်းဝင်ကြပါတယ်။ ဘုရားရှင်ဟာ (၇)ရက်ပြည့်ပြီးနောက် မဟာပုဏ္ဏရဟန္တာအား ဒီစန္ဒကူးနံ့သာကျောင်းမှာနေ၍ သာသနာပြုပါဟု တာဝန်ပေးကာ သာဝတ္ထိပြည်သို့ ပြန်ကြွပါတယ်။ ယခုအခါ စန္ဒကူးနံ့သာကျောင်းဟာ မီးလောင်သွားပြီးဖြစ်လို့ ၎င်းကျောင်းတော်နေရာမှာ စေတီတည်ထားပါတယ်။

ဝါဆိုလ ၄င်းဘုရားပွဲကာ လမှာဆိုလျှင် များစွာသောငါးတွေ ဘုရားဖူးလာကြလို့ ကုသိုလ်ရေးအတွက် ငါးစာကျွေးရတာဟာ စိတ်ဝင်စားစရာတစ်ခုပါ။ (အဲဒီငါးတွေဟာ မာလာယုကျွန်းရဲ့ စန္ဒကူးနံ့သာတောက ဘီလူးတွေကနေ ဖြစ်လာတာလို့ ဆိုကြပါတယ်။)

အခန်း (၅)

မြတ်စွာဘုရားရှင်ဟာ ၀ါဏိစ္စဂါမရွာမှအပြန်တွင် နမ္ပဒါမြစ် (ယခုမန်းချောင်း)မှ ဖြတ်သွားရာ နဂါးမင်းကထွက်၍ ပင့်ဆောင်သဖြင့် နဂါးပြည်ထိကြွကာ တရားဒေသနာဟောကြားတော်မူခဲ့ပါတယ်။ နဂါးမင်းက နောင်အခါ ကိုးကွယ်ပူဇော်ရန် ဘုရားရှင်၏ကိုယ်စား တစ်ခုခုပေးခဲ့ပါရန် တောင်းပန်သဖြင့် မြစ်ကမ်းစပ်တွင် ခြေတော်ရာတစ်ဆူကို ချထားပေးတော်မူခဲ့ပါတယ်။ ၎င်းပါဒစေတီဟာ ယခုအခါ “အောက်စက်တော်ရာဘုရား”လို့ အမည်တွင်ပြီး၊ မန်းချောင်းအနီးတွင်တည်ရှိသောကြောင့် “မန်းစက်တော်ရာဘုရား”“မန်းရွှေစက်တော်ဘုရား”လို့လည်း ခေါ်ဆိုကြပါတယ်။

အဲဒီနောက် ဘုရားရှင်ဟာ သစ္စာဗန္ဓတောင်ဘက်ဆီသို့ ဆက်၍ကြွသွားပြီ သစ္စာဗန္ဓရ သေ့ကြီးအား ဒီတောင်မှာနေရစ်ပြီး သာသနာပြုရန်တာဝန်ပေးတော်မူပါတယ်။ သစ္စာဗန္ဓရသေ့ကြီးဟာ လည်း ၀တ်ပြုကိုးကွယ်ရန် ဘုရားရှင်၏ကိုယ်စား တစ်ခုခုပေးသနားတော်မူပါရန်တောင်းပန်သဖြင့် ဘုရားရှင်ဟာ တောင်ပေါ်မှာ ခြေတော်ရာတစ်ဆူကို ချထားပေးပြီး သာဝတ္ထိပြည်သို့ ပြန်လည်ကြွသွားတော် မူပါတယ်။

၎င်းပါဒစေတီကို ယခုအခါ “အထက်စက်တော်ရာဘုရား”လို့ အမည်တွင်ပါတယ်။ စက်တော်ရာတည်ရှိရာဒေသများမှာ မကွေးတိုင်းဒေသကြီး၊ မင်းဘူးမြို့မှ မော်တော်ကားဖြင့် မိုင် (၃၀) ကျော် အကွာတွင်တည်ရှိသည်။ ရန်ကုန်နှင့်မန္တလေးတို့မှ ရွှေစက်တော်ဘုရားအထိ မော်တော်ကား ဖြင့်သွားလျှင် (၁၀)နာရီကျော် ကြာပါမည်။ ရွှေစက်တော်ဘုရားပွဲတော်ကို နှစ်စဉ် တပို့တွဲလဆန်း (၅)ရက်မှ တန်ခူးလနှစ်ဆန်း တစ်ရက်နေ့အထိ (၂)လကျော်ကြာ စည်ကားသိုက် မြိုက်စွာ ကျင်းပသည်။

Credit : မူရင်းရေးသားသူ